طلياني طلياني حتى الثمالة

أنا إيطالي

Sono italiano

I am Italian

Je suis italien

Soy italiano

Ich bin italienisch

Sou italiano

Ik ben Italiaans

Я – итальянец

私はイタリア人です

وبكل لغات العالم طلياني أنا

يمكن الظاهرة دي مش موجودة في مصر وإن كانت موجودة فهي على الخفيف أوي، بس هي موجودة في بعض البلاد العربية وعلى الأخص سورية ولبنان.
الظاهرة دي هي إظهار مشاعر الحب بشراسة وتشجيع فريق كرة قدم من الفرق الكبيرة على مستوى العالم زي إيطاليا (طبعاً أول دولة) أو ألمانيا أو فرنسا وكتير بيشجع البرازيل أو الأرجنتين والفرق الكبيرة كتيرة مش هنقدر نذكرها كلها.
المهم بتتجلى وتظهر الظاهرة دي أثناء بطولات كأس العالم لكرة القدم، وبتيجي في المرتبة التانية بطولات أمم أوروبا ولكن وقتها بينحرم منها مشجعي البرازيل والأرجنتين أو المكسيك.
يمكن دلوقتي وإحنا في بداية بطولة أمم أوروبا 2008 المقامة في النمسا وسويسرا ...تلاقي أنصار الفرق معلقين الأعلام على شبابيك وبلكونات بيوتهم أو على عربياتهم، وكل واحد فيهم فرحان بفريقه ومفتخر بيه وفاكر فريقه إنه هو الأقوى والأجدر وإنه الذي لا يُقهر، وييجي وقت المعركة ووقت المباريات ومع لمة الصحاب (الرفقات) وخصوصاً في الأماكن أو المقاهي العامة وتلاقي كل واحد بيشجع فريقه بكل كيانه وروحه ودمه ويبقى حامل هم الخسارة؛ طبعاً علشان فريقه هيخسر ويمكن هيخرج برا المنافسة والبطولة خالص....بس الهم الأكبر إنه بيكون حامل هم تريقة ومسخرة أصحابه وأهل حتته (حارته بالشامي) بعد خسارة فريقه وتلاقي الجميع ....الأصحاب والعزال وخصوصاً العزال على تلقيح وتريقة وكلام مالوش لازمة....ويلا، بس أحلى حاجة فعلاً لما تكون المباراة بين فريقين قوايا وفريقك يفوز ويخرج الفريق التاني من المنافسة....تحس كدة إنك مشرأب ومحدش يسألني يعني إيه، المهم الجو بيبقى ظريف وممتع ويمكن بيخرج الواحد شوية من همومه والضغوطات اللي عليه، ويمكن يكون ده هو السبب الأساسي باستمتاعي، وعلشان كدة محدش يستغرب لأني بكتب الموضوع ده وفي نفس الوقت بكتب مواضيع تانية (سياسية أو جادة) فهذه نقرة وتلك نقرة....البني آدم لازم يكون حاجات كتير ومش حاجة واحدة علشان يقدر يعيش؛ بشرط إن ميكنش فيه تضارب بين الحاجات.

أخيراً بحب أقول إني مقدرتش أعلق علم إيطاليا على الشباك أو البلكونة أحسن يفتكروني هنا في مصر عميل إيطالي أو عضو بالمافيا الإيطالية، فأنا قررت إني أعلق العلم على المدونة وأدعم منتخب إيطاليا لحد ما يفوز ببطولة أمم أوروبا 2008 وتكون المرة التانية في تاريخه بعد سنة 1968، وأعلن للجميع إني.....طلياني طلياني حتى الثمالة.